吳綺莉疑有情緒病 醉酒失控亂罵人

涉嫌虐女及藏毒（搜出疑似大麻）被捕的吳綺莉（Elaine），被女兒踢爆有酗酒習慣兼長期情緒不穩。《頭條日報》接觸到吳綺莉身邊人，透露其實獨力養女苦撐多年的Elaine早患情緒病同厭食症，情緒起伏極大，更因精神緊張而長期手震。被捕前數天（3月8號），Elaine主持的有線節目《寵物ER》外景隊到其家拍攝，據知當日Elaine開工前已飲至面紅紅，其間更突然怒罵攝製隊「誤」將卓林攝入鏡，發狂地叫監製刪掉有關片段，突然發癲行為嚇怕所有工作人員。

[img]http://www02.ktzhk.com/attachment.php?aid=726010&noupdate=yes&nothumb=yes[/img]

當日，因為卓林的愛貓肚屙，Elaine邀請了獸醫上門應診，順道安排她主持的《寵物ER》外景隊入內拍攝。據稱，素顏殘爆的Elaine面紅紅加表現亢奮，似飲了不少酒。為了拍攝貓咪生活點滴，攝影師在試位時用wide shot，此舉即觸動吳綺莉的神經，突然爆Seed大鬧：「我畀你哋入嚟，唔係畀你影我間屋。」又命令必須刪剪所有見到卓林的鏡頭。不過，Elaine情緒去到高點後又好快平息，一切如常拍攝，Elaine仲笑晒口同愛貓影合照。據知，當晚母女二人已經冇交流，Elaine只會喝令卓林，囡囡就乖乖從命，不敢反抗。

「因為經濟壓力太大，吳綺莉頻臨情緒爆煲邊緣，緊張髮型過晒火位，每次出鏡前不停問人好唔好睇？又經常要求睇相睇片，日日唔願食嘢終日以酒解愁，飲醉就胡言亂語，搞到自己暴殘同暴瘦。」經常同Elaine合作的知情者愈爆愈多，坦言欣賞她自力更生，但奈何唔爭氣。「近年佢四圍搵朋友搲撈，自己唔生性，朋友真係幫到盡。之前有傳佢同劉美娟喺DBC（數碼廣播）開咪做節目，劉美娟好不滿佢帶埋酒入直播室飲，又成日匿喺廁所，更試過用完廁所殘留『怪味』，有人即時向高層舉報，佢『斷正』即炒，就算有好多人幫佢求情都冇用，最後有猛人出頭平息，吳綺莉先可以保住飯碗，幾個月後重返，但就被調出舊節目。」

記者就傳聞以短訊問劉美娟，她拒談關於吳綺莉的事，回覆說：「我不想回覆了！」至於吳綺莉個人操守是否有問題？她就叫記者問返DBC。而傳聞當日怒炒吳綺莉的DBC行政總裁羅燦就否認此事，他說：「我冇聽聞過，傳聞對當事人唔公平，當日只係節目調動，呢個調動喺電台嚟講好正常。」當問到吳綺莉表現如何？羅燦停了數秒，然後避談：「我係睇節目收視嘅啫，佢個節目都幾受歡迎！（係咪因為拍擋做得好？）咁呢啲你自己解說嘞。」他又指，有員工跟吳綺莉溝通過，她情緒確實有困擾，但現階段冇需要停工。另外，《寵物ER》監製強調，吳綺莉只是對家居曝光比較敏感，反應較緊張，但好快平靜，絕對唔係失控。